Veprimi i deputetit socialist Alket Hyseni, i cili sulmoi ish-kryeministrin Berisha duke e quajtur një ‘plak autik’, ka revoltuar psikologen Denada Toçe. Hyseni e sulmoi Berishën nëpërmjet një postimi në Facebook, e pas komenteve e reagimeve të shumta, ai e ndryshoi termin ‘autik’ me ‘i çartur’.
Në një intervistë për Fax News, psikologia Toçe e dënoi ashpër veprimin e deputetit, duke thënë se ishte një fyerje për të gjithë shoqërinë shqiptare.
Më tej, ajo u shpreh se termi ‘plak’ i përdorur nga Hyseni është një tjetër paragjykim, ndërsa shtoi se deputeti socialist nuk e ka më vendin në Parlament.
Ajo tha:
Për mua thelloi problematiken. Edhe të thuash fjalën ‘plak’ është një paragjykim tjetër, Duhet t’i kujtoj se pleqtë e Shqipërisë janë pjesë e shoqërisë ku inteligjenca e tyre është më me vlerë se mendtë e zotërisë që ka thënë këto gjëra. Emri plak është paragjykues, edhe ajo fjalë është shumë problem. Për mua nuk është falje, për mua është faj, jo gabim se është i përsëritur, jo vetëm nga ai por edhe nga PS. Ai nuk e ke vendin në Parlament, ndjeshmëria ka humbur që kur përdoren fjalë që paragjykojnë shoqërinë. Nuk është përdorur vetëm fjala ‘autik’ por edhe fjalë të tjera fyese. E shikoj në debatet në rrjetet sociale që janë mesazhe shumë të ulëta për të përfaqësuar figura politike. Habitem se çfarë edukate kanë trashëguar nga familjet e tyre dhe si mund të banalizohet e të humbasë fjalori njerëzor, është mungesë qytetarie dhe tregon nivelin ku ka rënë politika.
