Paris Saint-Germain ka mposhtur 2-0 Manchester United në Old Trafford në ndeshjen e parë të 1/8-ave të Champions League. Me Neymar dhe Cavani të dëmtuar, trajneri Thomas Tuchel ka vendosur një formacion tepër solid në fushë teksa Kylian Mbappe ishte sulmuesi i vetëm.
Dhe u duk qartë në pjesën e parë se kampioni i botës nuk kishte mbështetje në sulm, por nga krahu tjetër as United nuk po arrinte të tregohej i rrezikshëm. Pas një pjese të parë të barabartë, Kimpembe zhbllokoi rezultatin për miqtë në minutën e 53’ pas krosit të Angel Di Maria-s nga këndi.
Pak minuta më pas erdhi goli fantastik i Mbappe, i asistuar përsëri nga Di Maria, i cili është konfrontuar edhe me tifozët e Djajve gjatë pjesës së dytë. Koret e tyre e kanë nxehur argjentinasin të prodhonte një nga paraqitjet më të mira të kohëve të fundit.
Di Maria dështoi te United në periudhën e Van Gaal, por është rikthyer të hakmerret ndaj klubit që e shiti vetëm një sezon pasi e bleu. Djajtë duhet ta mbyllnin takimin me një lojtar më pak pas të kuqit të Paul Pogba, i cili duhet të dilte nga fusha pas ndërhyjes brutale ndaj një prej lojtarëve të PSG.
Një avantazh i rëndësishëm për francezët, të cilët thjesht duhet të ruajnë rezultatin në ndeshjen e kthimit për të kaluar në çerekfinale.
Roma ka fituar 2-1 ndeshjen e parë të 1/8-ave të Champions League të luajtur në shtëpi kundër Porto-s.
Protagonisti i takimit ka qenë 19-vjeçari Nicolo Zaniolo, i cili ka realizuar të dy golat e verdhekuqve dhe është bërë futbollisti më i ri italian që shënon dy gola në një ndeshje të Champions League.
Ka qenë një paraqitje ëndrrash për ish-talentin e Inter-it, i cili ka gjetur golin e tij të parë në Champions me goditjen e parë në portë në minutën e 70-të dhe gjashtë minuta më vonë ka realizuar edhe të dytin për verdhekuqtë.
Festa e vendasve është prishur 11 minuta para fundit, kur Adrian ka fiksuar rezultatin në 2-1. Ky gol i portugezëve mund të rezultojë vendimtar në ndeshjen e kthimit që do të luhet 6 marsin e ardhshëm në Portugali.
