Mediat gjermane kanë befasuar opinionin futbollistik europian, teksa raportohet se trajneri i PSG-së, Tomas Tuhel është shkarkuar nga pankina e nënkampionëve të Europës.
“Bild” dhe “Sky Germany” bëjnë me dije se drejtori i parizienëve Leonardo i ka komunikuar gjermanit Tuhel vendimin për ta liruar nga detyra.
E gjitha ka ndodhur mbrëmjen e djeshme pas fitores së kampionëve të Francës 4-0 ndaj Strasburgut.
Edhe pse e drejtoi PSG-në në finalen e Ligës së Kampioneve sezonin e kaluar për herë të parë në histori, mosmarrëveshjet e Tuhel me Leonardon nuk kanë reshtur gjatë muajve të fundit.
Ish-trajneri i Totenhemit Mauricio Poketino përflitet si kandidati kryesor për të marrë frenat e PSG-së.
