Gazeta italiane “La Verita” ka publikuar ditën e sotme një tjetër video, ku dëshmon një korrupsion gjigant te krerët e lartë të shtetit fqinj.
Me titullin “Rasti trondit qeverinë në Shkup”, gazeta italiane ka publikuar një material të ri në lidhje me rastin “Reket”.
Në videon e publikuar, dëgjohet teksa Bojan Jovanovsk, i njohur ndryshe edhe si Boki 13, i kërkon Orce Kamçev të shpjegohet pse paratë janë me prerje 50 euro dhe jo më shumë, ndërsa hidhte dyshime se mos bëhej fjalë për ndonjë mashtrim. Nga ana tjetër, Kamçev përgjigjet se në bankë nuk ka mundur të gjejë kartëmonedha më të mëdha.
Gjatë bisedës, Boki i kërkon Kamçev edhe një takim. Sakaq, mes tyre dëgjohet edhe një zë gruaje, e cila i thotë Kamçevit që të mos brengoset, pasi sipas saj “çdo gjë do të jetë në rregull!”.
