Partia Socialiste, vë në dispozicion transport falas për votuesit që banojnë jashtë qyteteve ku janë të regjistruar si votues. Rastet konkrete vijnë nga PS e Shkodrës dhe e Lezhës. Zgjedhësve u vihet në ndihmë me një njoftim publik me informacione të detajuara dhe numra kontakti për çdo bashki të qarkut Shkodër e Lezhë.
Raportimi vjen nga organizata, “Za’lart” në rubrikën “shpenzime elektorale te ekzagjeruara”, ku thuhet: “Në ditën e heshtjes elektorale, Partia Socialiste ka nxjerrë njoftime publike thuajse në të gjitha qarqet, ku vendos në dispozicion mjete transporti për votuesit për të shkuar tek qendra e votimit. Brenda njoftimit, votuesit ftohen të votojnë nr 2.”
Redaksia e “Tirana Today”, referuar këtij denoncimi, kontaktoi me disa prej numrave të publikuar në njoftimet e PS-së nga ku rezultoi se njoftimi dhe kontaktet ishin të vërteta. Sipas komunikimit, të interesuarit që banojnë në Tiranë, duhej të mblidhen pranë selisë qendrore të PS- së, nga ku nisen për në destionacionet përkatëse.
“Banon jashtë qytetit ku je i rgjistruar si votues? Të nevojitet transport më 25 qershor? Telefono numrin e kontaktit për bashkinë tënde dhe bëhu pjesë e ekipit fitues”, thuhet në njoftimin e PS-së.
/Tirana Today/
