Kuvendi pritet të mblidhet sot në orën 10:00, ku një nga pikat më të nxehta që do diskutohet në punimet e seancës është projektligji për statusin e gjyqtarëve dhe prokurorëve.
Në seancën e sotme pritet të mungojë sërish opozita, e cila e ka bojkotuar këtë sesion të ri parlamentar që prej fillimit më 3 shtator.
Me sallën e boshatisur në radhët e opozitës, edhe seanca e sotme pritet të zgjasë fare pak, dhe pa debate.
Kjo do të jetë seanca e pestë në të cilën opozita do të mungojë në Parlament, ndërkohë që çdo të enjte ka zhvilluar seanca paralele në të gjitha qytetet.
Sakaq, në rendin e ditës për seancën e sotme në Parlament vijojnë të mbeten të mbartura ligjet që kërkojnë shumicë të cilësuar, siç është projektligji “Për disa shtesa dhe ndryshime në ligjin ‘Për statusin e gjyqtarëve dhe prokurorëve në Republikën e Shqipërisë’” dhe projektligji “Për një ndryshim dhe shtesë në ligjin ‘Kodi Rrugor i Republikës së Shqipërisë’”.
