Vjen përplasja e parë mes presidentit Meta dhe PS-së. Mazhoranca ka rrëzuar sot dekretin e Metës, i cili kthente për rishqyrtim ligjin për tarifat gjyqësore.
Përfaqësuesit socialistë në Komisionin e Ligjeve votuan kundër dekretit, ndërsa ata të PD-së dhe LSI-së votuan pro.
Në dekretin e kreut të shtetit thuhej ndër të tjera se vendimi për rritjen e tarifave nuk ka ardhur pas një studimi të thelluar në këtë fushë:
“Niveli i tarifave, i parashikuar në këtë ligj, është bërë në mungesë të një studimi të thelluar dhe, në krahasim me tarifat e sotme, ka një rritje drastike dhe të menjëhershme të tarifave, gjë e cila paraqet rrezik të lartë për vështirësimin e aksesit në drejtësi për shtresat në nevojë”, thuhet në dekretin e kreut të shtetit.
Gjatë diskutimeve në komision, deputeti socialist Bashkim Fino tha se nuk ka rritje të tarifave gjyqësore në projektligj.
“Duhet ta rrëzojmë dekretin e Presidentit sepse është i pabazuar për të bërë ndryshime në projektligj. Si relator propozoj që ta rrëzojmë dekretin dhe të mbajmë atë variant që kemi paraqitur në Parlament”, tha Fino.
Nga ana tjetër, PD u shpreh pro dekretit të Presidentit Meta, duke vënë theksin te rritja e madhe e tarifave që do të paguajnë qytetarët për t’iu drejtuar gjykatave, duke e cilësuar si një ligj që bëhet për t’i rrjepur ata.
