Në kohën kur Komisioni Hetimor për shkarkimin e Presidentit, do të zhvillojë sot një mbledhje, Meta bën lëvizjen e radhës. Pas një sërë mbledhjesh e diskutimesh, sot Komisioni Hetimor pritet të hapë dosjet kundër Kreut të Shtetit, Ilir Meta.
Sipas informacioneve, në tryezën e Komisionit Hetimor kanë mbërritur informacione nga institucionet ligjzbatuese, mbi veprimtarinë dhe deklaratat e bëra nga Kreu i Shtetit, të cilat tashmë do të hapen nga anëtarët për të mësuar dhe evidentuar shkeljet që mund të ketë kryer presidenti Meta para, gjatë fushatës dhe në ditën e heshtjes zgjedhore sa u takon zgjedhjeve parlamentare të 25 prillit. Teksa pritet që mbledhja të nisë në orën 13:00, Presidenti Ilir Meta niset sot në një vizitë zyrtare drejt Sllovenisë.
Kreu i Shtetit do të marrë pjesë në përvjetorin e 10-të të Takimit të Udhëheqësve të Procesit të Brdo-Brijunit, që do të mbahet në Qendrën e Kongresit të Brdos në Kranj.
49 deputetë hodhën firmat, për të ngritur Komisionin Hetimor për shkarkimin e Presidentit Meta. Shumica socialiste e argumenton kërkesën “bazuar në disa shkelje të rënda të Kushtetutës sipas parashikimeve të Nenit 90, nga ana e Presidentit Ilir Meta përpara dhe gjatë fushatës zgjedhore”.
Në mbledhjen e fundit të zhvilluar të premten, anëtarët e Komisionit Hetimor kanë zgjedhur dy ekspertët ligjor të Komisionit, Erind Mërkurin dhe Artan Spahiun. Gjatë mbledhjes është diskutuar mbi përgjigjet e marra nga institucionet, në lidhje me objektin e Komisionit për shkeljet e kryera nga Presidenti Ilir Meta, gjatë fushatës zgjedhore të 25 prillit.
