Ministri i Jashtëm serb ka provokuar sërish sot nga Beogradi, teksa e ka quajtur Kosovën “Jerusalemin e Serbisë”.
Teksa mori pjesë në një konferencë me rastin e 25-vjetorit të themelimit të marrëdhënieve diplomatike midis Izraelit dhe Serbisë, Daçiç tha se Serbia e vlerëson parimin e qëndrimit të Izraelit për mosnjohjen e “pavarësisë së shpallur të njëanshme të Kosovës”, ndërsa shtoi se “ajo pasqyron pozitivisht cilësinë dhe përmbajtjen e marrëdhënieve të përgjithshme mes Serbisë dhe Izraelit”.
“Zonja dhe zotërinj, Kosova është Jerusalemi ynë”, tha Daçiç në hyrje të fjalimit, raporton novimagazin.rs.
Ministri i Punëve të Jashtme të Serbisë ka vlerësuar se për marrëdhëniet midis Serbisë dhe Izraelit mund të thuhet se ata janë “në rrugën e duhur” me perspektivën për të qenë edhe më të mirë dhe më të kënaqur, duke shtuar se marrëdhëniet e mira janë dëshmuar nga rritja gjithnjë e më shumë e dialogjeve politike, bashkëpunimi më intensiv ekonomik dhe prania e investimeve izraelite në Serbi.
Kjo deklaratë e ministrit serb vjen pak ditë pas vendimit të Trump për të njohur Jerusalemin si kryeqytet të Izraelit, vendim ky që ka shkaktuar reagime të shumta nga liderët botërorë, të cilët kanë dalë kundër presidentit të SHBA-ve, duke e cilësuar vendimin si një “rrezik për stabilitetin dhe paqen në botë”. TIRANA TODAY
