Na ndanë dhe një ditë nga ndeshja “delikate” mes Serbisë dhe Zvicrës, e cila ka bërë shumë bujë ditët e fundit në mediat botërore. Ky intere4s kaq i madh vjen për shkak se tek helvetët luajnë 4 lojtarë me kombësi kosovare. Në Serbi po kërkojnë me çdo kusht t’i japin konotacion politik kësaj ndeshjes. Fillimisht ishte Alexander Mitrovic që provokoi lojtarët shqiptarë që luajnë për Zvicrën duke theksuar: “Kur janë kaq patriotë pse nuk luajnë për Kosovën”. Një kundërpërgjigje ndaj këtyre deklaratave erdhi sot nga mediat në Zvicër, që dolën në mbrojtje të lojtarëve të tyre.
Por kjo nuk përfundon me kaq, pasi vetëm pak minuta më parë Ministri i Jashtëm i Serbisë, Ivica Daciq hodhi “kunjin” e radhës, “Do luajmë kundër Zvicrës, Shqipërisë apo Prishtinës”, janë fjalët e tij në një takim me homologun e tij nga Liberia, vend i cili ka revokuar më parë njohjen e pavarësisë së Kosovës.
“Politika dhe sporti nuk duhet të jenë të përziera. Por, kjo nuk është e mundur për ndeshjen e së premtes. Sepse ne nuk e dimë nëse luajmë kundër ekipit kombëtar të Zvicrës, atyre të Shqipërisë apo Prishtinës”, tha Ivica Daciq.
Siç duket kjo është një taktikë që po ndjekin në Serbi për të shpërqendruar vëmendjen e ndeshjes tek shqiptarët që do të luajnë me Zvicrën. Kjo mbështetet edhe në idenë se në konferencën për shtyp të Tosic dhe Tadic u përmend ndeshja e 14 tetorit 2014 mes Shqipërisë dhe Serbisë që u ndërpre për shkak të dhunës në fushë, po ashtu u kujtua edhe se Taulant Xhaka që ishte në fushë me Shqipërinë në atë ndeshje është vëllai i Granit Xhakës që luan për Zvicrën.
