Maturantët në të gjithë vendin kanë protestuar për vështirësinë e provimit të matematikës me pretendimin se teza ishte e formuluar gabim dhe me tendencë. Në Tiranë, ata bllokuan sërish Rrugën e Durrësit.
Protesta nisi fillimisht në Tiranë, ku maturantët u mblodhën para Ministrisë së Arsimit duke bllokuar rrugën e Durrësit dhe me pankarta nëpër duar disa syresh kërkuan që Ministria e Arsimit të modifikojë sistemin e pikëve që behet për ndarjen mes notave kaluese me 4-ën.
Pas Tiranës, maturantët u ndoqën nga bashkëmoshatarët e tyre edhe në qytetet e tjera të Shqipërisë si Korçë, Gjirokastër, Elbasan, Fier, Shkodër, Durrës ku kërkesat dhe ankesat për testin e matematikës ishin të njëjta. Në deklaratat e tyre matyrantët shprehen se pyetjet ishin të një niveli të vështirë dhe se shumica e pyetjeve janë përkthyer nga testet e Cambridge që në shqip nuk kanë kuptim dhe nuk përshtaten me atë që është mësuar në 3 vite gjimnaz.
