Kryeprokurorja e Tiranës, Elisabeta Imeraj ka folur lidhur me vrasjen e bankierit Artan Santo, ngjarje e ndodhur në 26 qershor të vitit 2014 përpara zyrës së tij të punës në ish-Bllok, dhe për të cilin ende nuk ka një autor.
E ftuar në emisionin ”Opinion” në Tv Klan, Imeraj nuk preferoi të jepte shumë detaje, për shkak të sekretit hetimor, por theksoi se rihetimet për një dosje nuk nisin asnjëherë nëse nuk ka element të rinj që mund të çojnë në zbardhjen e ngjarjes.
Elisabeta Imeraj: ”Ne duhet të heqim dorë dhe ju si media dhe ne si prokurorë dhe Gjykata në vetvete dhe opinioni mbarë nga të veshurit e Prokurorisë me përdorimin sepse në këtë mënyrë nuk lini prokurorët dhe gjyqtarët të bëjnë punën e tyre. Ne po flasim për një ngjarje më të frekuentuar të Tiranës dhe më të mbrojtur dhe është një lloj sfide për çdo prokurorë që merret me këtë çështje.
Çdo rifillim i një çështje bëhet në bazë të një plani të mirëstudiuar kur dalin element të rinj që mund t’i shfrytëzojmë për të gjetur autorin. Në detaje të tjera nuk munde ti ndajmë me opinion publik për shkak të sekretit publik. Nuk do të doja ta zgjasja më shumë të folurën për hetimin e vrasjes së Santos për shkak se kjo dosje i është kaluar për kompetencë Prokurirsë së Posaçme.”
Si ndodhi vrasja
Artan Santo u ekzekutua në 26 qershor të vitit 2014 përpara zyrës së tij të punës në ish-Bllok. Biznesmeni ka qenë duke shkuar në punë, teksa papritur dy persona e kanë qëlluar me armë zjarri. Ata janë larguar më pas menjëherë nga vendngjarja.
Autorët e vrasjes së Santos kanë organizuar çdo gjë në mënyrë perfekte, pasi kishin ndjekur itinerarin e biznesmenit. Në momentin e vrasjes, autorët kanë qenë të maskua, dhe kamerat e shumta të sigurisë në këtë zonë nuk i kanë identifikuar. Ata kanë kryer ekzekutimin dhe janë larguar pa asnjë gjurmë.
