Protestës së qytetarëve kundër rritjes së çmimeve, që janë mbledhur para Kryeministrisë, i janë bashkuar edhe personat me aftësi të kufizuara.
Për të katërtën ditë me radhë, qytetarët janë ngritur në protestë, duke kundërshtuar rritjen e çmimit të naftës dhe produkteve të shportës.
Aktualisht çmimi për litër nafte në Kosovë është 1.5 euro, teksa sot në vendin tonë çmimi i naftës është 223 lekë.
Tubuesit mbanin me vete pankarta të ndryshme. Në krye të saj qëndronte slogani “Boll na vodhët”. Po ashtu, protestuesit bënë thirrje për të liruar të arrestuarit e tre protestave të kaluara.
“Asnjë polic nuk është prekur me dorë. Asnjë xham nuk është thyer. Asnjë trotuar nuk është ndotur. 140 të rinj janë shoqëruar pa bërë asgjë”, tha një aktivist.
Avokati Adriatik Lapaj u bëri thirrje qytetarëve që të mos tërhiqen më.
“Mos u tërhiqni më, kjo është mundësia juaj, luftoni, çojeni deri në fund. Larg duart nga xhepat e qytetarëve”, tha ai.
