Përmes një deklarate për mediat, kreu i grupit parlamentar, Petrit Vasili, sikundër herët e tjera është ndalur tek krimi, pas ngjarjeve të bujshme të cilat kanë zaptuar vendin. Ai i ka qëndruar besnik deklaratave të dhëna edhe më herët, ku zgjidhja gjendet tek largimi i kryeministrit me qeverinë e tij.
Vasili vë theksin edhe tek rasti i Shkodrës, ku sipas tij, qeveria nuk vepron dot, për shkak të lidhjeve me krimin. Ai po kështu shton se në komisariatin e Shkodrës, udhëheqin bandat kriminale.
“Sot ne përballemi me një situatë nga më të rëndat të krimit në vend, ku shkaktar dhe ideator i kësaj situate është kryeministri Rama, me qeverinë e tij. Veçanërisht më e rëndë është ngjarja e Shkodrës, ku qeveria nuk vepron dot, për shkak të lidhjeve me krimin dhe në komisariatin e Shkodrës, udhëheqin bandat kriminale”, deklaroi Vasili.
Kreu i Grupit Parlamentar të LSI-së, theksoi se pikërisht për shkak të kësaj situate të rëndë kriminale, vendi po shkon drejt një rrënimi ekonomik, dhe rreth 70 % e shqiptarëve duan të largohen një orë e më parë nga vendi. Ai e cilësoi këtë qeveri si aventurierësh dhe hajdutësh.
“Ne do të përballemi me këtë qeveri aventurierësh dhe hajdutësh, me të gjitha mjetet demokratike, deri sa të çlirojmë vendin nga kthetrat e saj”, tha kreu i grupit parlamentar të LSI-së.
Petrit Vasili nuk i kurseu kritikat edhe ndaj Reformës në Drejtësi, të cilën e cilësoi si një nismë të kapur nga qeveria, dhe që po shkatërron drejtësinë në vend, duke nxjerrë jashtë funksionit gjykatat kryesore të Shqipërisë.
https://tiranatoday.com/basha-le-ne-balte-berishen-asnje-date-per-protestat/
