Burimet policore dhe shëndetësore kanë bërë të ditur se të paktën 18 persona kanë mbetur të vdekur, gjatë përleshjeve mes protestuesve dhe forcave të sigurisë në Bagdad të Irakut,vetëm gjatë natës së kaluar.
Ndërkohë, mediat e huaja raportojnë se qeveria po mundohet t’i qetësojë protestuesit, duke prezantuar një plan të ri për reforma. Autoritetet vendase janë zënë në befasi nga shkalla e lartë e protestave, ku si pasojë e të cilave kanë mbetur të vdekur rreth 100 njerëz që nga e marta e kaluar.
Dy vjet pas fitores kundër Shtetit Islamik, gjendja e sigurisë është më e mirë se më parë, por niveli i korrupsionit është i lartë, ka shumë papunësi dhe shërbimet publike janë të dobëta, raporton Reuters. Plani me 17 pika i kryeministrit Adel Abdul Mahdi, erdhi si rezultat i një takimi emergjent të kabinetit qeveritar të shtunën në mbrëmje.
Pjesë e këtij plani është edhe pagesa e pjesshme e shpenzimeve të përditshme për njerëzit e varfër, programet e trajnimit për të rinjtë si dhe shtimi i ndihmave sociale për personat e papunësuar.
Familjet e personave të vrarë gjatë protestave gjithashtu do të dëmshpërblehen dhe ndaj tyre do të ketë përkujdesje njësoj si ndaj familjeve të forcave të vrara në luftë.
