Kryetarja e Lëvizjes Socialiste për Integrim, Monika Kryemadhi tha se do të protestojmë në 27 janar bashkë me njerëzit si shenjë ndërgjegjësimi për çështjet që na shqetësojnë.
Ajo tha në “Ora News” se nuk është e pagabueshme, ndërsa shkoi më tej duke bërë fajtorë për situatën politike qeverinë Rama, por edhe aktorët civil në tërësi madje duke bërë fajtore edhe median.
“Është e tmerrshme të fillojmë të diskutojmë që të zgjedhim të keqen më të vogël. Nëse unë kam gabimet e mia, eja t’i diskutojmë hapur. Ne duhet të pranojmë gabimet që kemi dhe në bazë të tyre duhet të fillojmë një strategji kombëtare pa dallim bindjesh. Sot, për t’i parë gjërat me një sy tjetër e ndjej se të gjithë jemi përgjegjës për këtë situatë, jo vetëm politika por edhe media dhe shoqëria, duke thënë se ky është problemi im”-tha Kryemadhi.
Për Kryemadhin të protestosh për ngjyrat politike nuk përbën ndonjë lajm, por 27 janari do të jetë një protestë e madhe kundër papunësisë dhe varfërisë dhe mungesës së shkollimit.
“Unë them se 27 janari është komplet gjë tjetër për të sensibilizuar opinionin publik se duhet të protestojmë që Shqipëria është një vend i hapur dhe demokratik. Njerëzit kanë protestuar edhe për ngjyrat, jo më të protestosh për papunësinë dhe shpopullimin që është një strategji e qëllimshme”-shtoi ajo.
