Rektorët e universiteteve publike janë thirrur sot në dëgjesë nga Komisioni për Edukimin dhe Mjetet e Informimit Publik, për t’iu përgjigjur pyetjeve për protestën e studentëve si dhe për qëndrimin e tyre ndaj VKM-ve dhe Ligjit të Arsimit të Lartë.
Sipas axhendës, debati do të nisë në orën 10:00, ndërsa pas dy orësh në komision pritet të vijë edhe ministri Lleshaj, i cili do të pyetet për ndërhyrjen e Policisë në ambientet e fakulteteve dhe dhunën e ushtruar ndaj studentëve.
Rendi i ditës:
Ora 10:00
Seancë dëgjimore me rektorët e Universiteteve publike për situatën e krijuar në universitete gjatë dhe pas protestës studentore; menaxhimi i situatës rast pas rasti; situata financiare në Universitete; qendrimi e rektorëve ndaj VKM-ve.
Ora 12.00
Seancë dëgjimore, me kërkesën e një grupi deputetësh, me Ministrin e Brendshëm, z. Sandër Lleshaj, për të dhënë shpjegime dhe informacione në lidhje me dhunën e ushtruar në ambientet e fakulteteve ndaj studentëve.
Mbledhja e ditës së djeshme e këtij komisioni u shoqërua me përplasje dhe debate mes anëtarëve dhe drejtuesve, ndërsa Albana Vokshi, e cila njëherësh mban frenat e këtij komisioni në replikë me deputetët socialistë, u shpreh se protesta e studentëve i ka çorientuar këta të fundit.
