Kryetari i Partisë Demokratike, Lulzim Basha mblodhi sot grupin parlamentar për të diskutuar për protestën masive të 13 majit.
Basha iu kërkoi deputetëve që të nisin menjëherë punën në terren për të organizuar në mënyrë të detajuar marshimin në bulevard kundër kryeministrit Rama dhe qeverisë së tij. Duke iu referuar rastit të Kavajës, Basha specifikoi se ajo ishte një përvojë e vlefshme në aksionin e opozitar të ndërmarrë që prej muajit shkurt.
Për këtë arsye, kryedemokrati i ka udhëzuar deputetët e tij që të bëjnë të mundur sjelljen e sa më shumë njerëzve në ditën e protestën për të treguar sipas tij, se pjesëmarrja masive është shenjë vendosmërie. Sipas Bashës kjo është “qëndresë deri në fund për zgjedhje të lira e të ndershme”.
Basha shpjegoi se 13 maji është stacioni në rrugën për fitoren e kauzës qytetare dhe politike
Në mbledhjen e grupit parlamentar bëhet e ditur se deputetja Majlinda Bregu ka dalë kundër bojkotit të zgjedhjeve parlamentare të 18 qershorit dhe mënyrës sesi opozita po e zhvillon aksionin e saj politik.
Nga ana e tij, gjithë aksionin politik të deritanishëm të opozitës, e ka cilësuar si sukses të njerëzve të thjesht dhe një dështim të grupit të tij parlamentar. “Atë që arriti çadra në 78 ditë, nuk e arriti grupi në 3 vite”, u shpreh Basha.
