Qendrat e spiunazhit rus në Beograd, Sofje e Vjenë kanë kryer një bilanc të ofensivës së tyre në Ballkan. Puna e seksionit të Sofjes në Maqedoni e Shqipëri vlerësohet si frytdhënëse në korruptimin e medieve dhe trukimin e imazhit të Rusisë, ndërkohë që seksioni i Beogradit cilësohet si qershia mbi tortë, sa i përket suksesit të arritur në bllokimin e integrimit të rajonit në Bashkimin Evropian.
Trendi i blerjes se mediave elektronike dhe atyre te shtypit te shkruar duket se përveçse është kthyer në një trend është kthyer edhe në një “mollë sherri” midis drejtuesve të Shërbimeve Sekrete Ruse. Një takim urgjent është zhvilluar midis drejtuesve të qendrave të spiunazhit rus që mbulojnë Ballkanin, përkatësisht atyre të Sofjes, Beogradit dhe Vjenës. Qëllimi i takimit kësaj radhe nuk ishte analiza e punës së deritanishme të këtyre Qendrave të cilat grumbullojnë dhe analizojnë informacionet e grumbulluara nëpërmjet Ambasadave të tyre në vendet ku veprojnë dhe operojnë. Përkatësisht Qendra e Sofjes mbulon Bullgarinë, Maqedoninë dhe Shqipërinë. Qendra e Beogradit mbulon Serbinë, Kosovën dhe Malin e Zi. Ndërsa qendra e Vjenës mbulon Kroacinë, Slloveninë dhe Bosnje-Hercegovinën.
Vitet e fundit Rusia ka ndjekur në mënyrë të suksesshme kursin e depërtimit dhe shtimit të influencës në Ballkan nëpërmjet përdorimit të medias. Kjo metodë për Moskën ka rezultuar shume efikase, kryesisht vitet e fundit, ku hapja e portaleve mediatike është shtuar në një numër të paparashikueshëm dhe informacioni që përcillet aty është tepër i madh e i larmishëm. Nëpërmjet këtyre medieve, Moska ka mundur të depërtojë në jetën politike, ekonomike dhe sociale të këtyre vendeve.
Fillimisht këtyre mediave të shtypit të shkruar dhe atij elektronik u servireshin në formë informacionesh të ndryshme disinformacione që këto qendra inteligjence spiunazhi merrnin dhe përcillnin për llogari të Moskës zyrtare dhe për qëllime të përhapjes së propagandës ruse, shpjegon 55.
Më pas drejtuesit e Shërbimeve Sekrete Ruse SVR dhe atij të Shërbimit Sekret Ushtarak GRU, duke parë se kjo formë po jepte rezultate menduan të avancojnë duke u munduar që të blinin media vendase në zonat ku operojnë këto qendra spiunazhi ose aty ku nuk do blinin, do krijonin media të tilla nëpërmjet njerëzve të tyre të besuar.
Politikës ekspansioniste të propagandës ruse i erdhi në ndihmë teknologjia pasi pati një përhapje të madhe trendi i portaleve mediatike. Menjëherë ky trend u ndoq nga shefat e këtyre qendrave te spiunazhit të cilët shfrytëzuan rastin që nëpërmjet njerëzve të tyre të hapnin portale në të gjithë Ballkanin ku pjesë e programacionit dhe lajmeve te tyre ishin edhe lajme apo materiale nga Rusia.
Finesa e tyre arriti deri aty sa në vende të ndryshme, media të ndryshme e bënin përhapjen e influencës ruse edhe duke pasqyruar lajme negative mbi Rusinë, por qëllimi ishte që në çdo mënyrë Rusia duhet të ishte prezente. Disa prej tyre i bënë jehonë të madhe përfshirjes së Rusisë në luftën kundër Shtetit Islamik, ISIS.
Por i gjithë ky sukses duket se i ka gjetur të papërgatitur vetë këto qendra të kryeqyteteve të Ballkanit e konkretisht në Sofje, Beograd dhe Vjenë. Në takimin e zhvilluar me urgjencë, në qendër nuk ishte as festimi i suksesit të arritur në fushën e blerjes se mediave në Rajonin e Ballkanit dhe as menaxhimi i tyre, por konkurrenca dhe gara që ka hyrë vetë brenda këtyre Qendrave se kush prej tyre ka blerë dhe kontrollon me shumë media.
Gjatë takimit, kritikat më të shumta dhe pjesë e problematikës ka qenë Qendra e Spiunazhit të Sofjes, e cila është akuzuar se kohët e fundit nuk ka treguar efikasitet dhe se numri i mediave në kontrollin e saj është ulur ndjeshëm. Nga ana e tyre, drejtuesit e këtij stacioni janë justifikuar me faktin se në Maqedoni dhe kryesisht ne Shqipëri, duke marrë shkas nga ngjarjet e ndodhura në Maqedoni, shërbimet Sekrete të këtyre vendeve të asistuara nga SHBA dhe NATO ua kanë vështirësuar punën, shkruan 55.
Në pozita më të forta duket se është Qendra e Beogradit, e cila me gjithë ngjarjet në Malin e Zi duket se i duan ende një numër të madh mediash nën komandën e saj. Qendra e Vjenës duket se dhe ajo gjithashtu është në pozita të mira megjithëse dhe vendet të cilat ajo mbulon duket se janë aktive nëpërmjet Shërbimeve te tyre te Inteligjencës.
Nga ana tjetër përfaqësuesit e Sputnik të cilët në mjafte raste janë edhe kamuflimi i punonjësve të këtyre Qendrave janë ankuar se nuk mund të bëjnë më detyrën e këtyre Qendrave dhe se ata duhet të ndërrojnë strategji.
