Kryeministri Edi Rama duke folur në takimin elektoral me zgjedhësit e Vorës, u ndal tek çështja e pronës dhe problematika jetëgjatë në këtë sektor.
“Nëse do të na jepni besim, do kemi një sistem të përqendruar në një. Agjencia e Kthimit të Pronës, ALUIZNI dhe Hipoteka do të shërbejnë si tre departamente të së njëjtit institucion”, tha ai.
Por për këtë tha ai, “Kemi nevojë për bashkim të shqiptarëve përtej flamujve partiakë e përtej krushqive në mënyrë që të bëjmë revolucion për shtetin që duam”.
Ai u kujtoi zgjedhësve të Vorës se edhe pse u arrit legalizimi 300 ndërtimeve në këtë zonë, procesi nuk është definuar pasi nuk është bërë i mundur hipotekimi, se hipotekën e ka një parti tjetër, theksoi ai.
Nga çështja e pronave ku i njohu shumë merita vetes dhe veçanërisht ish kreut të ALUIZNI-t, Artan Lames, Rama u hodh tek ato që i cilësoi si sukseset e mëdha të qeverisë së tij.
Ai përmendi Reformën Administrative dhe atë të Arsimit, si arritjet e mëdha shtetbërëse
Në fund të fjalës së tij Kryeministri tha se beteja që po zhvillon nuk është e tija, por e shqiptarëve.
“Lufta për të bërë shtet, është lufta e shqiptarëve, jo e imja. Unë thjeshtë i jap zë asaj.
Ky sistem duhet fshirë për ta nisur shtetbërjen nga themelet”, shtoi ai.
Ajo që ra në sy më së shumti gjatë fjalës së Ramës në Vorë, ishte atakimi vazhdimisht i emrit të kryerepublikanit Famtir Mediu, ish ministër i Mbrojtjes në kohën e tragjedisë së Gërdecit, gjë të cilën ua kujtoi banorëve.
