Referuar ngjarjes së rëndë që i ndodhi Klodiana Lalës, kolegu i saj, Flamur Vezaj, tregon se ka edhe raste kur pronarët e mediave të ndryshme u kanë besuar më shumë kriminelëve dhe zyrtarëve shtetërorë, sesa gazetarëve.
Ish-gazetari i kronikës, i cili prej dy vitesh është zhvendosur në SHBA, sikundër kolegët e tij i ka mëshuar fort faktit se gazetarët në Shqipëri marrin çdo ditë kërcënime dhe ofendime nga kriminelët, zyrtarë të ndryshëm, oficerë e drejtues policie, prokurorë e me raste edhe gjyqtarë.
“Kërcënimet e fyerjet janë ‘bukë’ e përditshme për gazetarin e kronikës në Shqipëri. Te punosh gazetar i kronikes së zezë në Shqipëri, dhe të mos marrësh kërcënime, i bie qe nuk je duke bere punën si duhet!
Nuk ka gazetar të kronikës së zezë që është në terren e që nuk është kercënuar, ofenduar e fyer nga kriminelet, zyrtarë të ndryshëm, oficer e drejtues policie, prokurorë e me raste edhe gjyqtarë!
Nuk ka gazetar kronike qe ka qenë i kërcënuar dhe organet ligjzbatuese apo zyrtaret e drejtësisë të kenë zbuluar apo ndjekur penalisht autorin! Nuk ka gazetar kronike, qe problemet me individ të ndryshëm qoftë edhe kërcënimet nga te gjitha llojet qe nuk i ka zgjidh privatisht, se nuk ka gjet zgjidhje me shtetin!
Nuk ka gazetar kronike qe nuk është zëne me kryeredaktorin, drejtorin apo pronarin e medias ku punon, per shkak se ky i fundit besonte me shume zyrtarin apo me raste edhe kriminelin”, ka pohuar ai, i cili së fundmi ka qenë pjesë e televizionit “Abc News”.
Vezaj ka hedhur poshtë informacionet se ai ka përfituar azil politik në SHBA, duke shtuar se ka ikur përmes Lotarisë Amerikane, për një të ardhme më të mirë për fëmijët e tij, e cila nuk iu garantohej as në Shqipëri, dhe as në Kosovë.
Sa i takon rastit të Klodiana Lalës, policia ka marrë në mbrojtje familjen e gazetares investigative.
Në orët e para të mëngjesit të 30 gushtit, banesa e prindërve të gazetares së tv “News 24” u bë pre e një sulmi me breshëri automatiku, të tipit mafioz.
Në banesë, në momentin e ngjarjes kanë qenë prindërit, vëllai, motra dhe dy vajzat e saj të mitura.
https://tiranatoday.com/detajet-si-ndodhi-sulmi-ne-shtepine-e-babait-te-gazetares-klodiana-lala/
