Gjyqi ndaj deputetit të Partisë Social Demokrate, po shoqërohet me një situatë të paprecedentë, ndërsa mësohet se Prokuroria e Krimeve të Rënda ka braktisur gjyqin në dy seanca të njëpasnjëshme.
Prokuroria ka munguar në seancat ndaj Doshit pa asnjë justifikim dhe argument. Organi i akuzës po zvarrit çështjen për të cilën ka ngritur vëtë këtë akuzë. Është vetë Prokuroria e Krimeve të Rënda, e cila e akuzon Doshin për pastrim parash, por për prokurorinë kjo është hera e dytë që ka munguar në seancën gjyqësore.
“Gjyqtarja Liljana Baku, ka tentuar të bëjë një komunikim me Prokurorinë e Krimeve të Rënda, Besnik Hajdarmataj, për të marrë një përgjigje mbi arsyetimin e mosprezencës së prokurorisë, por mësohet se nuk ka pasur asnjë përgjigje nga titullarët e këtij institucioni”-shkruan Shqiptarja.com.
Ndërsa në seancë ka munguar edhe vetë Doshi, por është përfaqësuar nga avokati i tij. Sakaq, seanca e radhës ndaj Doshit do të mbahet me 16 janar.
