Prokuroria ka nisur hetimet për pajisjen me pasaportë diplomatike të stilistit Valdrin Sahiti. Pas lajmit të publikuar në mediat në Kosovë, mësohet se këshilltari i kryeministrit Albin Kurti, Durim Berisha ka njoftuar se i është drejtuar Prokurorisë së Shtetit për hetime për pasaportën diplomatike të Sahitit. Me anë të një postimi në Facebook, Berisha ka publikuar përgjigjen e Prokurorisë së Shtetit, lidhur me kërkesën e tij. Nga ky institucion kanë njoftuar se parashtresa e tij i është dërguar Kryeprokurorit të Prokurorisë Themelore në Prishtinë, meqë kjo Prokurori ka kompetencë për të zhvilluar hetimet.
Valdrin Sahiti thuhet se ndër vite është i pajisur me pasaportë diplomatike, gjë të cilën jo çdokush mund ta ketë. Sipas mediave nga Kosova thuhet se stilistit ia ka dhënë Presidentja e Kosovës, Vjosa Osmani pasaportën. Por këto pretendime u hodhën poshtë nga këshilltari për media i Osmanit, i cili deklaroi se Presidentja nuk ka një kompetencë të tillë.
Lidhur me këtë, nga Presidenca e Kosovës kanë deklaruar se presidentja nuk i ka lëshuar pasaportë diplomatike askujt, asnjëherë.
Bekim Kupina, Këshilltar i Presidentes Vjosa Osmani, ka theksuar se pyetjet e tilla duhet t’iu parashtrohen qeverisë paraprake.
“Presidentja as nuk lëshon e as nuk merr pasaporta diplomatike. Pra nuk i ka lëshuar pasaportë diplomatike asnjëherë askujt. Për qindra pasaporta të raportuara në media, pyetjet duhet të drejtohen tek Qeveria paraprake, sepse janë lëshuar gjatë qeverisjes së tyre”, ka shkruar këshilltari i Osmanit.
