Komisioni i Integrimit ka miratuar sot amendimet e propozuara nga deputeti Ditmir Bushati, për projektrezolutën për çeljen e negociatave të anëtarësimit në BE. Dje, në mbledhjen e Komisionit, ish ministri i Jashtëm ka kërkuar mendime në projektrezolutën, për vlerësimin e punës së nisur nga KE. Gjithashtu, Bushati ka kërkuar që të ngrihen organet e drejtësisë brenda këtij viti.
Kryetarja e këtij Komisioni, Rudina Hajdari, tha se palët kanë rënë dakord për mendimet e propozuara nga Bushati, dhe se janë në pritje të një përgjigje pozitive nga KE për çeljen e negociatave.
Në projektrezolutën me 10 pika kërkohet “që institucionet shqiptare, bazuar në parimet demokratike dhe me një përfaqësim të ligjshëm të vijojnë të përqendruar në reformat e ndërmarra, dhe t’i përfundojë ato në respektim të kuadrit kushtetues e ligjor në fuqi, duke bërë të mundur rezultate konkrete në zbatimin e përparësive të vendosura nga Komisioni Evropian për hapjen e negociatave, deri në anëtarësimin me të drejta të plota në Bashkimin Evropian.
Projektrezoluta i drejtohet gjithashtu edhe shteteve anëtare të Bashkimit Europian, në kuadër të Samitit të ardhshëm të Këshillit Evropian i cili do të mbahet me datat 17-18 tetor 2019, ku një ndër pikat e diskutimit në rendin e ditës do të jenë edhe vendimet për hapjen e negociatave me Republikën e Shqipërisë dhe me Republikën e Maqedonisë së Veriut”.
