Ditmir Bushati ka marrë fjalën pas kritikave të Petrit Vasilit lidhur me projektligjin për “Mbrojtjen e Pakicave Kombëtare”.
Ministri Bushati tha nga foltorja e Kuvendit se Vasili në kohën që ka qenë ministër i Drejtësisë, ishte pro këtij projektligji.
“Kur ishte ministër i Drejtësisë kolegu u shpreh në favor të ligjit, ku ishte anëtar i kabinetit qeveritar. Nuk kishte asnjë pakënaqësi. Është krejt normale kur njeriu kalon nga njëra anë në anën tjetër të tavolinës të ndryshojë mendimin
Konventa në kuadër të Këshillit të Europës përcakton qartë këtë ligj. Nuk ka koncept zonash minoritare. Nuk ka zonë minoritare. Sot për sot mbi bazën e standardeve ndërkombëtare, konventa flet për ato koncepte që pasqyrohen besnikërisht në ligj. Njoha e minoriteteve në këtë ligj nuk do të thotë se këto pakica kanë të njëjtën karakteristikë dhe të njëjtat të drejta dhe s’kanë dallime mes tyre.
Të vish këtu dhe të kesh fobi dhe të dëshmosh fobi ndaj pakicave dhe konventës kuadër që i trajton të gjitha nuk do të thotë që ato janë të barabarta. Pakicat etnike janë fakt. Boshti orientues i debatit të sotëm duhet të jetë tradita jonë dhe kushtetuta shqiptare,” tha Bushati.
