Në një intervistë për VOA, drejtori Ekzekutiv i “Fundjava Ndryshe”, Arbër Hajdari ka folur për aktivitetin e këtij fondacioni tashmë prej 2 vitesh në Shqipëri, si dhe planet e të ardhmes. Ai ka zbuluar se shpejt një nga grupet që do të ndihmohet nga fondacioni që ai drejton, do të jenë dhe personat që janë të varur nga droga.
“Kemi pasur marrëdhënie me dhuruesit, ku kanë dhurua 2.5 milion dollarë. Unë mendoj që shqiptarët dhurojnë.
Njerëzit duhet të japin diçka nga jeta e tyre. Shqiptarët në radhë të parë kanë qenë skeptikë ndaj bamirësisë. Unë e njoh mirë terrenin. Njerëzit kanë humbur besimin e të dhuruarit pasi fondi i tyre është abuzuar. Ç’do person që ka dhuruar në “Fundjavë Ndryshe”, ka dhuruar edhe më parë në një shoqatë tjetër. Por duke qenë se shoqatat nuk kontrollohen nga shteti, ata kanë abuzuar me fondet”.
Sipas tij strategjia që ka ndjekur “Fundjava Ndryshe”, për të qenë sa më transparente është pjesëmarrja e dhuruesit kur shkojnë për t’u ardhur në ndihmë shtresave në nevojë.
“Ti do të vish bashkë me ne që të marrësh pjesë në bamirësi. 1 % e bamirësve janë shqiptarët donatorë nga diaspora. Ne nuk dërgojmë paratë që individi ka kontribuar, por ne u dërgojmë të mira materiale për të cilat ata kanë nevojë”.
Më tej Hajdari shprehu se me aktivitetin e nismës ai do të përcjellë dhe një model për rininë shqiptare.
“Në faqen e “Fundjava Ndryshe”, ne i postojmë të gjitha aktivitet. Kemi qenë në 940 fshatra dhe pjesë e nismës janë bërë më shumë se 40 mijë njerëz. Ne duam që të përçojmë një model që rinia shqiptare të përcjellë shpresë se Shqipëria do të bëhet më mirë” tha Hajdari.
E ndërsa foli për projektet e radhës, drejtori Ekzekutiv i “Fundjava Ndryshe”, është shprehur se së shpejti po punohet për të hapur një qendër rehabilitimi për personat e varur nga lëndët narkotike.
“Ne kemi donacione nga biznese dhe persona. Kemi lidhur marrëveshje bashkëpunimi me shumë biznese. Kemi ndërtuar 40 shtëpi në të gjithë Shqipërinë.
Plani ynë me i afërt është që të ngremë qendrën e rehabilitimit të personave që janë të varur nga droga.
Shumë persona aty, në hapje të qendrës nuk do të paguhen por do të punojnë si vullnetarë. Ne bashkë me njerëzit do të ngremë sisteme që do të funksionojnë”, përfundoi në fjalën e tij Hajdari.
