Më shumë se 345 milionë njerëz në mbarë botën po përballen me “nivele akute të pasigurisë ushqimore”, ndërsa lufta në Ukrainë po shkon në muajin e pestë, thotë Programi Botëror i Ushqimit (WFP).
Lufta e vazhdueshme, e kombinuar me rritjen e çmimeve globale të karburantit dhe pasojat e pandemisë Covid, ka rritur ndjeshëm kërcënimin e afërt të urisë në të gjithë botën.
Pjesa më e madhe e eksporteve të grurit me vlerë të lartë të Ukrainës janë në rrezik të kalbjes në magazinat lokale, ndërsa rusët vazhdojnë bllokimin e porteve të Ukrainës në Detin e Zi.
“Ne jemi jashtëzakonisht të shqetësuar. Ne po përballemi me krizën e trefishtë”, tha Matthew Hollingworth, Koordinatori i Emergjencave për WFP në Ukrainë.
“Vitin e ardhshëm… ne mund të kemi jo vetëm një problem të aksesit të ushqimit, por edhe një problem të disponueshmërisë së ushqimit”, thotë ai – pasi vendet, të cilat tashmë nuk mund të përballojnë të importojnë ushqime, luftojnë për të prodhuar të korrat e tyre. “Unë do të shpresoja që arsyeja e shëndoshë të mund të mbizotëronte dhe të pranonte se kostoja njerëzore e kësaj lufte shkon shumë përtej kufijve të Ukrainës”, thotë ai. “Duhet të ketë një mirëkuptim që globalisht bota nuk mund të përballojë urinë në 2022 dhe 2023. “Kostoja njerëzore është shumë e madhe”, shton ai.
Burimi i lajmit: BBC. Përshtatur nga Tirana Today
