Gramoz Ruci u zyrtarizua sot si kreu i Kuvendit të Shqipërisë për 4 vitet e ardhshme dhe ka mbajtur poste të rëndësishme në Partinë Socialiste. Ka qenë kryetar i grupit parlamentar të PS në legjislaturën e kaluar, por gjithnjë figura e tij ka mbartur mister, lidhur kjo me pozicionet që ai ka mbajtur në periudhën e komunizmit.
Por kush është Gramoz Ruci, numri 3 i shtetit shqiptar?
Gramoz Ruçi lindi më 6 dhjetor 1951 Salari, një rrethinë e Tepelenës, në jug të Shqipërisë. Studioi kimi, dhe filloi punë si mësues bio-kimie në Progonat.
U njoh me bashkëshorten e tij me mbiemrin Goxharaj, me të cilën u martua në vitin 1976. Në vitin 1985, Ruçi filloi karrierën e tij politike në radhët e regjimit komunist.
Ai u emërua Sekretar i parë Partisë së Punës i rrethit të Tepelenës në vitin 1988, dhe në vitin 1990 ai u emërua Ministër i Brendshëm. Nga viti 1992 deri në vitin 1996 ai ishte Sekretar i Përgjithshëm i PS.
“Shtëpia e Gjetheve”, ka risjellë në kujtesën e shqiptarëve shtëpinë nga e cila përgjoheshin dhe ku përdoreshin tortura speciale kundër kundërshtarëve politik në kohën e diktaturës. Një nga objektet e ekspozuara është edhe një foto që pasqyron hierarkinë e ministrave të Brendshëm, që drejtonin këtë shtëpi torturash.
“Piramida e varësisë partiake dhe administrative”, shkruhet në këtë fotografi në majë të së cilës qëndron Enver Hoxha dhe më poshtë emra famëkeq si Mehmet Shehu, Feçor Shehu, Aredin Shyti, Hekuran Isai, Simon Stefani, Ramiz Alia dhe Gramoz Ruçi, kryeparlamentari i ri i zgjedhur nga Rama.
Ndërkohë që karriera e tij në periudhën e demokracisë është ngitur në Partinë Socialiste, ku bie në sy potenca dhe autoriteti në vendimmarrje.
