Studentja e drejtësisë Ariela Murataj 21 vjeç, u vra një ditë më parë nga Aldison Belulaj, 23-vjecari nga Zharrëza e Fierit. Në media u fol se ishte krim pasioni pasi vajza ka refuzuar të lidhej me të.
Profesori i të ndjerës, Erlis Hereni thotë së ky nuk është një krim pasioni. Hereni ka folur në lidhje me këtë ngjarje në emisionin “Studio e Hapur” në News24 tha se hetimet do thonë më shumë se një krim pasioni. Hereni ndan bindjen se konflikti se ka lindur për një situatë të momentit.
Gjithashtu, Hereni deklaroi se pedagogët nuk kishin informacion se ajo përndiqej dhe kishte probleme të tilla. Ai tha ajo ishte një vajzë e shkëlqyer dhe me mesatare mbi 9. Pedagogu i drejtësisë tha se nuk kishin dijeni si staf pedagogjik se vajza përndiqej dhe sipas tij nuk beson se ngjarja është krim pasioni.
“Ajo ishte një vajzë me një mesatare mbi 9 dhe mund të kishte dhënë kontribut në sistemin e drejtësisë. Mbaj mend se ajo më thoshte pse jo profesor mund të bëhemi kolegë një ditë. Ajo vinte nga një fshat dhe luftonte për të arritur objektivat e saj. Në lëndën time i kam dhënë notën maksimale. Nuk kishim informacion se ajo përndiqej dhe kishte probleme të tilla. Nuk është krim pasioni dhe hetimet do thonë më shumë se kaq. Kjo besoj se ka lindur për një situatë të momentit. E ndjera duket sikur e kishte parashikuar këtë pasi kishte bërë edhe një status ku thoshte se armët nuk i vrasin njerëzit,” tha pedagogu Erlis Hereni.
