Mid’hat Frashëri është një nga figurat më të shquara, por dhe më kontradiktore të kombit. I adhuruar nga nacionalistët, dhe i mallkuar nga komunistët.
Bashkëpunimi me pushtuesin në Luftën e Dytë Botërore, ia ka errësuar jo pak kontributin madhor që ka dhënë për çështjen kombëtare.
Megjithatë askush nuk mund të mohojë se ai qe një nga pak mendjet brilante që ka pasur ky vend. Njihte shumë mirë shpirtin e shqiptarit, virtytet dhe veset e tij. Ndaj dhe ka bërë shumë parashikime, që kanë rezultuar të jenë profetike. Si shumë intelektualë, ai e shihte shpëtimin dhe përparimin e vendit nga inteligjenca.
Por sipas tij nëse injorantët vihen në ballë të punëve si pjesë e politikës atëherë Shqipëria do të shndërrohet në një ”kafene të madhe”.
“Në një kohë që fletoret e shtypit shtohen si kërpudhat në tokën e plehëruar, kurse gazetat shndërrohen në industri nacionale, druaj që intelektualët tanë për nga mënyra se si e shkruajnë shqipen nuk e dinë alfabetin e gjuhës shqipe deri në fund.
Madje ata as që kanë kohë ta nxënë tërë alfabetin e shqipes, duke qenë të zënë duke nxjerrë gazeta dhe për të vënë kandidaturën për tu bërë deputet, prefekt ose ministra. Në vijoftë puna kështu, Shqipëria do të bëhet një kafene e madhe!”- është shprehur Mid’hat Frashëri./TIRANA TODAY
