Pas tërmetit të fortë 6.6 ballë në Turqi, priten edhe paslëkundje të tjera. Kjo është paralajmëruar nga sizmiologu i njohur grek, Vassilis Papazachos. Ai ka thënë se do të ketë pasgoditje të tjera në ditët e ardhshme. Apeli i hapur vlen për të gjithë qytetarët, që të mos futen në banesat e dëmtuara, pasi ato mund të shemben nga një pasgoditje tjetër.
“Do të ketë një sekuencë të madhe pas tronditjesh, pas lëkundjesh që do të zgjasin për muaj të tërë, por me intensitet të madh në 48 orët e ardhshme dhe patjetër javën e ardhshme.
Ekziston një mundësi që disa goditje të tjera të ndodhin pas tërmetit”, tha eksperti. “Tërmetet e kësaj shkalle mund të sjellin fare lehtë një tërmet tjetër po kaq të fortë. Çdo ndërtesë që ka dëmtime, nuk duhet të banohet deri sa të vlerësohet nga inxhinierët”, tha ai në një intervistë për SKAI.
Më herët, presidenti i Turqisë, Recep Tayyip Erdoğan, reagoi duke theksuar se qeveria do t’i qendrojë pranë të gjithë qytetarëve të prekur. “Kemi filluar menjëherë punën për të ndihmuar qytetarët e prekur nga tërmeti. Kemi ngritur grupin e menaxhimit të krizës”, tha Erdogan.
