Një situatë kaotike u shkaktua pas prishjes së banesave në Jalë. Shumë persona u shoqëruan në polici, madje pati edhe përplasje mes banorëve dhe uniformave blu. Në pamundësi për të gjetur një vend ku të qëndrojnë, pas shembjes së banesave nga IKMT, për fat të keq familjarët e fisit Balaj në Jalë, e kanë kaluar natën në qiell të hapur.
Fadromat kanë shembur edhe të vetmen banesë me certifikatë pronësie që daton e vitit 1947. Një vajzë 14 vjeçare thotë se pas shembjes së shtëpisë, nuk ka arritur të shkojë as në shkollë, pasi librat i kanë humbur nën rrënoja.
E mitura ishte mes 7 personave që u shoqëruan në polici, pas përplasjes së IKMT me banorët. Ajo rrëfen se për plotë 10 orë është mbajtur në rajonin e policisë. Jo vetëm e mitura, por bashkë me të kanë qenë edhe i ati e kushërinjtë.
“Kanë qenë 10 orë fiks që më kanë mbajtur vetëm mua në polici, babin dhe kushërinjtë i kanë mbajtur më shumë. Unë jam pa larë, librat nuk e di fare ku i kam, nga kanë shkuar. Mbrëmë kam fjetur në makinë, në bagazh se nuk dija ku të shkoja”, ka thënë ajo për “Ora News”.
Ndërtesat e shembura një ditë më parë në Jalë, sipas banorëve, shërbenin si ndërtesa, ndërsa një pjesë e tyre shfrytëzoheshin për turistët gjatë muajve të verës.
