Prindërit e 40-vjecarit të humbur në Vlorë, Fejzi dhe Mjaftime Ngucaj dyshojnë se Ermalin e kanë rrëmbyer pasi kanë humbur kontaktet prej katër ditësh.
Ata kanë zbuluar bisedën e tij të fundit me bashkëshorten dhe më pas zhdukjen e tij.
“Djalin e kanë rrëmbyer. 4 ditë pa asnjë kontakt. Për herë të fundit ka folur me nusen. I ka thënë: Ik se ngatërrova rrugën. Hera e fundit që ka folur me nusen ka qenë ditën e hënë. Më pas telefoni është fikur. Nusja thotë se dyshojnë t’i ketë ndodhur gjë. Hera e parë që Ermali nuk komunikon për kaq gjatë. Makina është gjetur e braktisur në një tjetër fshat”, thanë prindërit.
Ndërsa babai i Ermal Ngucaj shtoi se të hënën u kthyen nga Italia dhe prisnin që i biri t’i merrte në Vlorë. Pas mungesës së tij njoftuan policinë ndërsa në makinën e braktisur janë gjetur rrobat e 40-vjecarit.
“Të hënën u kthyem nga Italia, po prisnim të na merrte djali në Vlorë. Nuk kemi fol më. Nuk dimë që djali të ketë pasur probleme. Kemi lajmëruar policinë. Në makinë janë gjetur edhe rrobat e Ermalit”, tha i ati Fejzi Nguca.
