Presidenti Ilir Meta nuk është i kënaqur me ecurinë e Shqipërisë për çeljen e negociatave me Bashkimin Evropian. Në një intervistë për “Albanian Daily News”, Meta tha se Shqipëria mund të ecë më shpejt drejt çeljes së negociatave, ndërsa shtoi se duhet vullnet i konsoliduar politik.
Pjesë nga intervista:
-Në shtator të vitit të kaluar, presidenti i Komisionit Evropian Juncker njoftoi se do të ketë një avantazh të Serbisë dhe Malit të Zi në procesin e integrimit krahasuar me vendet e tjera të Ballkanit. Si e konsideroni faktin që këto dy shtete kanë një kornizë kohore konkrete për anëtarësim, nderisa Shqipëria nuk është përfshirë në këtë paketë?
-Mendoj se Komisioni Evropian rikonfirmon nëpërmjet kësaj strategjie dy shtylla themelore të procesit të integrimit: së pari, perspektiva për anëtarësim të plotë, dhe së dyti, siguron një proces individual të merituar lidhur me afrimin ndaj standardeve të bashkëjetesës evropiane. Duke thënë këtë, entuziazmi dhe padurimi ynë për të kaluar sa më shpejt që është e mundur këtë rrugëtim,është i ligjshëm dhe në kontekstin aktual, unë mendoj se është një aset që meriton të vlerësohet.
Shqipëria i ka të gjitha mundësitë për të rritur shpejtësinë, por kjo kërkon vullnet politik të konsoliduar. BE dëshiron të shohë reforma më të thella, gjithëpërfshirëse dhe bindëse në fusha vendimtare, veçanërisht për sigurimin e institucioneve funksionale demokratike dhe sundimin e ligjit. Duke cituar raportin i cili thotë: “… sigurimi i dialogut konstruktiv në spektrin politik, posaçërisht brenda parlamenteve …” është e qartë se rivendosja e dialogut politik merr përparësi të veçantë.
Si President i Republikës, do të thosha për një lexim të kujdesshëm, të vëmendshëm dhe racional të strategjisë nga të gjithë aktorët politikë dhe institucionalë për të caktuar përparësitë e veprimeve që duhen ndërmarrë për të arritur sa më shpejt hapjen e negociatave të pranimit me BE. TIRANA TODAY
