Presidenti Meta ka reaguar në lidhje me emërimet e bëra në Gjykatën e Lartë ku nga sot është bërë me 7 anëtarë, nga 19 që duhet të ketë, dhe sipas tij kjo është e papranueshme, pasi me këto ritme procesi mbyllet në vitin 2024.
Postimi i plotë:
“Gjykata e Lartë, nga sot bëhet me 7 anëtarë, nga 19 anëtarë, që duhet të ketë.
Ka kaluar plot një vit nga momenti i propozimit nga Këshilli i Lartë Gjyqësor, të emërimit të 3 anëtarëve të parë.
Nëse Këshilli i Lartë Gjyqësor do të ndjekë këtë ritëm, atëherë Gjykata e Lartë, do të plotësohet me të gjithë trupën gjyqësore, në mars të vitit 2024.
Kjo gjendje është e papranueshme dhe duhet t’i shqetësojë të gjithë!
Bërja sa më shpejt dhe plotësisht funksionale e Gjykatës së Lartë, është me rëndësi jetike për vendin.
Plotësimi me të gjithë trupën e nevojshme gjyqësore të Gjykatës së Lartë duhet të jetë prioriteti kryesor i Këshillit të Lartë Gjyqësor, pasi lidhet drejtpërdrejt jo vetëm me mirëfunksionimin e sistemit gjyqësor, respektimin e të drejtave e lirive themelore të njeriut, si dhe me ruajtjen e stabilitetit ekonomiko-financiar të shtetit, por nga ana tjetër përbën një çështje jetike për të ardhmen europiane të Shqipërisë.”
