Prej ditësh, qoftë në daljet e tij publike, por edhe në postimet e ndryshme, Presidenti Meta ka hedhur në ‘treg’ idenë e një referendum popullor. Megjithëse është hedhur ideja për një referendum, e folura e tij ka qenë gjithnjë në parim, duke e lidhur me ‘ngërcin politik dhe kapjen e institucioneve.
Ditën e sotme, presidenti ka bërë një tjetër postim në facebook, ku pasi ka argumentuar parimin pse është kërkuar një referendum, ka bërë me dije se të hënën do të japë edhe propozime se për çfarë do të bëhet referendum.
“U bënë 21 vjet që klasa politike nuk nxjerr ligjin për zbatimin e këtij detyrimi kushtetues për të bërë të pamundur ushtrimin e demokracisë direkte! Por tani nuk ka më tolerim dhe as justifikime! Kjo klasë politike di vetëm të thellojë krizat dhe të mos mbajë përgjegjësi. Ajo nuk e njeh dialogun politik, interesin publik dhe kombëtar. Ndaj tani çdo gjë për t’ia dhënë fjalën sovranit përmes referendumeve. Çfarë e keqe e gjeti Zvicrën nga Referendumet? Le të pushojmë sot e nesër dhe të hënën do ju propozoj ide konkrete për Referendumin”, thekson Meta.
Po çfarë parashikon kushtetuta e Shqipërisë për referendumet?
Neni 150
- Populli, nëpërmjet 50 mijë shtetasve me të drejtë vote, ka të drejtën e referendumit për shfuqizimin e një ligji, si dhe t’i kërkojë Presidentit të Republikës zhvillimin e referendumit për çështje të një rëndësie të veçantë.
- Kuvendi, me propozimin e jo më pak se një së pestës së deputetëve ose me propozimin e Këshillit të Ministrave, mund të vendosë që një çështje ose një projektligj i një rëndësie të veçantë të shtrohet në referendum.
- Parimet dhe procedurat për zhvillimin e referendumit, si dhe vlefshmëria e tij parashikohen me ligj”.
