Sot do mblidhet Konferenca e Kryetarëve, ku pritet të diskutohet mes mazhorancës dhe opozitës për fillimin e procedurave dhe përcaktimin e datës së votimit të parë për zgjedhjen e Presidentit. Enkelejd Alibeaj ka konfirmuar se opozita do të jetë pjesë e tryezës së Konferencës së Kryetarëve, dhe bashkë me të, të pranishëm do të jenë edhe Agron Gjekmarkaj, Fatmir Mediu, Mesila Doda dhe Grida Duma.
Kryetari i grupit parlamentar të Partisë Socialiste, Taulant Balla nuk pranoi kriteret nr.2 dhe 3 të draftit të kreut të komanduar të Partisë Demokratike, Enkelejd Alibeajt, që opozita të propozojë 4 kandidatura për President të Republikës, ndërsa mazhoranca të zgjedhë 2 prej tyre dhe më pas të hidhen në votim në Parlament. Në një dalje për mediat, eksponenti socialist deklaroi se propozimi i palës kundërshtare është maksimalist, pasi i heq të drejtën shumicës që të propozojë emrat e saj për President të Republikës.
“Propozimi i tyre është një propozim maksimalist, një propozim që i heq shumicës të drejtën të propozojë. Megjithatë e përshëndes që ka një propozim. Ka një gatishmëri të Grupit Parlamentar të PD për t’u ulur. Jemi të gatshëm që të ulemi që nesër për të diskutuar propozimet tona dhe propozimet e tyre. Kjo do të ishte zgjidhja e tyre. Me të përfunduar Konferenca e Kryetarëve, nesër të ulemi dhe të diskutojmë. Më duket pa vend që të vish në një tryeze dhe t’i thuash tjetrit ‘ti nuk ke të drejtë të propozosh ”, deklaroi fillimisht Balla.
Më tej, zyrtari i lartë i selisë rozë u shpreh se propozimet e PD zyrtare janë të përshtatshme në rastin e zgjedhjes së Avokatit të Popullit, pasi opozita ka të drejtën kushtetuese të zgjedhë vetëm ajo këtë funksionar të lartë shtetëror. “Ne kemi qenë shumë të hapur dhe jemi shprehur që pjesë e propozimeve të jetë çdo qytetar shqiptar. Nesër në orën 12:30 është njoftuar për Konferencën e Kryetarëve, nesër fillon zyrtarisht procesi deri në raundin e pestë. Dua të kemi një President të gjithë shqiptarëve jo President të PS. Nëse do e donim këtë, i kemi numrat dhe do ta zgjidhnim. Propozimi që vjen nga PD është shumë i vlefshëm në rastin e zgjedhjes së avokatit të popullit, në rastin e zgjedhjes së avokatit e ka të drejtën të zgjedhë vetëm opozita”, tha Balla.
