Presidenti grek Prokopis Pavlopoulos ka përcjellë mesazhe të rrepta ndaj Shqipërisë dhe ish-Republikës Jugosllave të Maqedonisë.
Në një darkë të shtruar për nder të vizitës së presidentit francez Emmanuel Macron, presidenti grek tha se Shkupi dhe Tirana po minojnë me veprimet e tyre politike, ecurinë e tyre evropiane. Kjo, sipas tij, njëri fqinj duke përdorur një emër që përcjell irredentizmin dhe fqinji tjetër duke shkelur të drejtat themelore të njeriut dhe në veçanti të pronës.
“Kjo po ndodh edhe me Shqipërinë fqinje. Edhe ajo duhet të gjejë vendin e saj në BE, por me respekt të plotë tek të drejtat europiane. Dhe një prej shtyllave të të drejtave europiane janë të drejtat e njeriut. Kur shikojmë shkelje të tilla të të drejtave themelore, siç është për shembull e drejta e pronësisë, si është e mundur që Greqia të favorizojë një perspektivë të tillë europiane, të një shteti që shkel të drejtat europiane?!”, u shpreh presidenti grek.
Këto deklarata të rrepta Pavlopoulos i bëri gjatë fjalimit të tij, ku iu referua çështjeve kombëtare dhe marrëdhënieve me fqinjët.
