Presidenti çek Milos Zeman ka folur sërish për iniciativën e tij për tërheqjen e njohjes së pavarësisë së Kosovës. I ftuar në “TV Barandov”, Zeman ka thënë se propozimi i tij për tërheqje të njohjes do të diskutohet në takimin e Politikës së Jashtme çeke që do të mbahet në tetor.
Po ashtu Zeman ka theksuar se duhet të përmirësohen gabimet e 2008-ës, kur Çekia e kishte njohur pavarësinë e Kosovës.
“Në këndvështrimin tim, duhet të përmirësohet gabimi i bërë nga qeveria në 2008-ën, ku nuk u respektua rezoluta e përfaqësuesve të Kuvendit të Çekisë, të cilët votuan kundër njohjes së Kosovës”, tha ai. Sipas tij, qeveria e udhëhequr atë kohë nga Mirek Topolanek, bëri një gabim që duhet të përmirësohet, shkruan “lajmi.net”. Kujtojmë se e gjithë çështja me çnjohjen e Kosovës nga Çekia nisi me vizitën e presidentit çek, Milos Zeman në Beograd.
