Tre shqiptarë janë arratisur nga burgu i Trevisos në Itali. Ngjarja ka ndodhur rreth orës 05:00 të ditës së djeshme. Dy prej tyre janë kapur menjëherë nga policia e burgjeve, ndërsa i treti është në arrati.
Tre të dënuarit me origjinë shqiptare, janë arratisur nga burgu i Trevisos në Itali, ku kishin bërë gati planin dhe rreth orës 5 të mëngjesit ata kanë prerë hekurat e qelisë ku po vuanin dënimin dhe zbritën me çarçafë.
Liria për dy prej shqiptarëve zgjati shumë pak, pasi u kapën menjëherë nga policia italiane, ndërsa tjetri arriti të humbiste gjurmët. Ai është identifikuar si Edison Pula, 27 vjeç. Pula, anëtar i bandës së Niklës, u arrestua në shkurt të këtij viti në qendrën tregtare Emisfero di Silea. Ai ishte pjesë e bandës së grabitjes së shtëpive mes Trevisos dhe Bellunos. Ai është një nga të dyshuarit për grabitjen e naftëtarit Miotto në Mogliano Veneto.
Edison Pula ishte i dënuar me burg për vrasje, grabitje dhe trafik droge. Ai ishte ndaluar me urdhër-arrest për tentativë vrasje, grabitje, posedim eksplozivi dhe krime të tjera që lidhen me trafikun e drogës, të gjitha të kryera jashtë Italisë.
