Veç Albin Kurtit, policia e Kosovës ka arrestuar edhe dy deputetet Donika Kadaj-Bujupi dhe Albulena Haxhiun.
Arrestimi i tyre u bë sot teksa deputetët iu drejtuan Kuvendit të Kosovës. Edhe pse ata tentuan t’i bënin rezistencë policisë, deputetët u shoqëruan në komisariat.
Nga ana tjetër, policia ka hedhur gaz lotsjellës në drejtim të deputetëve, ndërsa nuk kanë munguar as konfrontimet fizike mes policisë dhe simpatizantëve të VV-së.
Arrestimi i tyre vjen një sitë pasi gjyqtari Beqir Kalludra urdhëroi arrestimin dhe caktoi edhe paraburgim, për shkak të mosparaqitjes së tyre në seancën gjyqësore ndaj hedhjes së gazit lotsjellës.
Kurti, Haxhiu, e Kadaj, akuzohen për hedhjen e gazit lotsjellës në Kuvendin e Kosovës gjatë seancave të vitit të kaluar, kur tentohej të bllokohej ratifikimi i marrëveshjes së Demarkacionit me Malin e Zi dhe ngritja e Asociacionit të komunave me shumicë serbe, sipas marrëveshjes së dalë nga dialogu me Beogradin.
Lidhur me arrestimin e deputetëve ka reaguar edhe kreu i Lëvizjes Vetëvendosja, Visar Ymeri, i cili e ka cilësuar aktin një brutalitet:
“Kjo është vazhdimësi e veprave të pushtetit, pas dënimit të aktivistëve tanë padrejtësisht. Është e njëjta klikë e pushtetit, e cila po synon që ta dhunoj votën e lirë të qytetarit, pas vendimit të djeshëm të PZAP-it dhe që po tentojnë të përndjekin secilin aktivistë të Vetëvendosjes”, tha Ymeri.
