Gazetarja Klodiana Lala, ka dhënë detaje të reja në lidhje me ekzekutimin e Endri Mustafës, të ndodhur ditën e djeshme në Shkodër.
E ftuar në emisionin ”Open”, Lala u shpreh se telefoni i Mustafës nuk është gjetur sapo forcat policore kanë mbërritur në vendngjarje, por mëngjesin e ditës së tretë, pasi familja kishte denoncuar humbjen e viktimës.
Ajo tha se pranë trupit të viktimës është gjetur një pistoletë, për të cilën ende policia nuk ka dhënë detaje nëse i përket Mustafës.
Klodiana Lala: ”Telefoni celular i viktimës nuk është gjetur, është gjetur mëngjesin e ditës së 3, autorët kanë patur kohë për të rrëmuar. Detaji i dytë është një pistoletë e gjetur në vendin e ngjarje, për të cilën policia nuk jep detaje nëse i përket viktimës. Nëse i përket viktimës përse lëvizte i armatosur? Nëse kjo pistoletë ju përket autorëve, praktikisht i bie të jetë i autorëve.”
Trupi i pajetë i Mustafës është gjetur paraditen e djeshme në zonën e Livadheve në Shkodër, tri ditë pasi familja kishte dhënë alarmin për zhdukjen e tij. I riu, i cili kishte marrë plumba në gojë, gjoks dhe kokë, njihet nga Policia e Shkodrës për përfshirjen në një sërë ngjarjesh kriminale që prej vitit 2009 kur ishte dënuar për plagosje.
