“Fundi është pranë për Nicolas Maduro. Jam i bindur se falë venezuelasve ditët e Maduros janë të numëruara”, kështu është shprehur shefi amerikan i Diplomacisë, Mike Pompeo në një intervistë për CNN.
Më herët, sekretari i Shtetit kishte deklaruar për televizionin “Fox” se populli venezuelas ka mundësuar që ditët e tij të jenë të numëruara:
“Ne shpresojmë fuqishëm që në ditët, javët dhe muajt e ardhshëm, regjimi i Maduros do të kuptojë se populli venezuelas ka mundësuar që ditët e tij të jenë të numëruara”.
I pyetur për një ndërhyrje të mundshme të forcave të armatosura amerikane, ai qëndroi konform me linjën e mbajtur që prej fillimit të krizës nga Uashingtoni duke mos e refuzuar këtë mundësi.
“Ne kemi thënë që të gjitha mundësitë janë në tavolinë. Ne do të bëjmë atë që duhet që (…) demokracia të mbretërojë dhe që një e ardhme më e mirë të krijohet për venezuelasit”, theksoi ai për “Fox”.
