Akuza pa fund kanë dalë në drejtim të kandidatëve për kreun e FSHF-së, Armand Duka dhe Bashkim Fino. Ky i fundi është akuzuar që në momentin që lajmi qarkullonte në media dhe nuk kishte asgjë zyrtare se do të ketë mbështetjen e PS-së. Këto akuza vinin pikërisht nga kreu aktual i Federatës, Duka.
Insistimi i Dukës dhe i stafit të tij ka vazhduar edhe në ditët e fundit se politika nuk duhet të ndërhyjë apo të ketë ndikimin në bashkitë të cilat kanë në menaxhim klubet dhe kanë të drejtën e votës. Por vetë ai ka preferuar që fushatën e tij dje ta nisë pikërisht duke kërkuar votën nga një përfaqësues i një subjekti politik.
Prej kohësh, Duka ka kërkuar mbështetjen e LSI-së, ndërsa mendohet se për këtë çështje ka takuar pak kohë më parë edhe Ilir Metën. Ndaj vizita e tij e parë publike që pas hapjes së fushatës për president të FSHF-së ishte në një Bashki që drejtohet nga një kandidat i dalë nga kjo forcë. Duka ishte dje në Berat, ku është takuar me kryetarin e Bashkisë, Petrit Sinaj, duke i kërkuar votën, meqë është ai presidenti i klubit të futbollit të qytetit.
Duka nuk ka folur për mediat pas këtij takimi, por duket hapur se ka nisur fushatën për të ushtruar ndikimin e tij politik, në kërkim të votës për president, edhe pse deri pak ditë më parë pretendonte se do të qëndronte larg politikës.
