Nga: Marsela Sinani/Teksa kreu i PD-së vë kujën nga Vlora, se shteti ka rënë dhe ndodhemi në emergjencë kombëtare, Policia e Shtetit krenohet me arritjet e saj, teksa ka bërë namin me operacionin e fundit policor të koduar “Nata e fundit”.
Blutë e Elbasanit kanë arrestuar në flagrancë një 29-vjeçar, autor i një sërë vjedhjesh të ndryshme. Deri këtu nuk ka asgjë për tu çuditur, por kur opozita po zbarkon nga një qytet në tjetrin, duke thënë se situata kriminale është në nivelet alarmante, policia nga ana tjetër merret me operacione të ‘guximshme’, të cilat shpenzojnë shumë kohë dhe mund.
Në kohën kur palët politike nuk po gjejnë gjuhën e përbashkët, për nivelin e kriminalitetit, policia tregon plot krenari në faqen zyrtare në Facebook, se ka arritur që të kapë një ndër “trafikantët” më të rrezikshëm që ka Elbasani, e si për ta konkretizuar këtë punë intesive, ka sekuestruar një pasuri që vetëm bota e mafies do ta posedonte. Këtu duhet të mbajmë frymën, pasi bëhet fjalë për unaza, varëse, byzylyk, disa monedha metalike, aparatet celuarë.
Opozita e ka kthyer tashmë në kryefjalë të ditës, shqetësimin mbi zaptimin nga kriminelët. Në çdo dalje, Basha së bashku me Kryemadhin kanë shprehur shqetësimin alarmant për situatën e rëndë të krimit të organizuar, dhe trafiqeve të lëndëve narkotike që po vërshon në Shqipëri, duke kërcënuar rendin publik, jetën, familjet dhe pronat e qytetarëve.
Shpesh Basha ka trumbetuar që këto fenomene duhen luftuar me zero tolerancë nga Policia e Shtetit. Dhe policia nuk qëndron duarkryq! Ka arritur që falë një pune intensive të kapë një super hajdut, i cili, për të kryer vjedhjet ka përdorur sqepar, një palë pinca, dy kaçavida, një levë metalike, një palë gërshërë prerëse.
Ky po që është një super aksion!!!
