Policia e shtetit, ka reaguar lidhur me incidentin e ndodhur në një qendër votimi në Shëngjin, ku LSI-ja pretendon se një komisioner i tyre është plagosur me armë.
Sipas një deklarate paraprake të policisë, edhe pse nga këqyrja e vendit të ngjarjes është gjetur dhe sekuestruar një gëzhojë, në spital nuk ka mbërritur asnjë person për ndihmë mjekësore.
Nga hetimet paraprake dyshohet se konflikti ka qenë i çastit midis shtetasit F.D. 27 vjeç, dhe personave të tjerë për të cilët po punohet për identifikimin e tyre.
Po sipas policisë ngjarja ka ndodhur në rrugën kryesore midis shkollës 9 vjeçare Shëngjin dhe lokal “Restorant Detari” në Shëngjin dhe jo në ambientet e ndonjë qendre votimi.
Nga tjetër ka reaguar lidhur me këtë ngjatje edhe kandidati për deputet i PS-së, Pjerin Ndreu i cili ka hedhur dyshimet se këto situata po krijohen qëllimisht nga LSI-ja.
