Ish-drejtori i ALUIZNIT, Ferdinand Shehu ka reaguar lidhur me vendimin e policisë, e cila i sekuestroi 1,5 milionë euro llogari banke.
Sipas njoftimit të policisë, ky bllokim është bërë pasi transaksioni bankar është kryer me burime të paligjshme. Mirëpo, Shehu i quan të pavërteta këto deklarime.
I pyetur nga “Ora News”, ka thënë se 1.5 milion eurot e sekuestruara janë të ardhura të siguruara nga shitja e një hoteli.
“1.5 milionë eurot e sekuestruara janë të ardhura të siguruara nga shitja e një hoteli”, sqaroi Shehu.
Po ashtu, në njoftimin e policisë thuhet se Shehu ka tentuar transferimin e 1 milionë eurove jashtë vendit, me justifikimin për investime financiare, ndërkohë 500 000 Euro të tjera i ka vendosur në depozitë me afat.
Lidhur me këtë, Ferdinand Shehu deklaroi se aktualisht ndodhet në Itali dhe se transaksioni që po kryhej, sipas tij, ishte në përputhje me ligjet shqiptare.
“Aktualisht ndodhem në Itali, nuk kam asgjë për të fshehur, do të kthehem në Shqipëri. Transaksioni që po kryeja ishte në përputhje me ligjet shqiptare, në rrugë bankare dhe noter. Do të ndjek të gjitha rrugët ligjore për të cilën nga ky moment është ngarkuar avokatja ime”, tha Shehu.
