Një vajzë e zhdukur prej 15 vitesh është gjetur mbrëmjen e së hënës nga policia.
Më 4 mars të vitit 2002, kur ajo ishte 23 vjeçe, familja bëri denoncim në Komisariatin e Librazhdit, ku kërkuan ndihmë për gjetjen e vajzës.
Esma T., tashmë 38 vjeçe, u shoqërua në Komisariatin nr.3. Familjarët morën një telefonatë, që me siguri i gëzoi shumë, por pa dyshim edhe i mërziti, pasi Esma nuk ka pranuar të kthehet në shtëpi.
Ajo ka deklaruar se ishte larguar nga shtëpia me dëshirën e saj, ndërsa shtoi se ka qëndruar gjatë gjithë kohës në Shqipëri.
Vajza ka thënë se është larguar pasi nuk i ofrohej asgjë, as nga familja dhe as nga shoqëria, dhe se gjatë gjithë kohës atje ka qenë e mbyllur, pa arritur të shohë asgjë se çfarë ndodhte jashtë shtëpisë së saj. Aktualisht, ajo ka thënë se punon prej disa vitesh, jeton në një shtëpi me qira dhe nuk preferon të kthehet më në shtëpinë e prindërve të saj, pasi ka ndërtuar jetën në kryeqytet, shkruan Panorama.
Sinjalizimin për vajzën e humbur duket se e kanë dhënë të afërm të saj, të cilët ishin në dijeni të shkëputjes së kontakteve me familjarët dhe e kishin parë në zona të ndryshme të Tiranës.
