Ish-banori i “Kafazit të Artë” dhe njëherësh tifozi i flaktë i Tiranës, Alban Rexha është në kërkim nga Policia, pas dhunës që u shkaktua në derbin Tirana-Partizani. Po ashtu, Komisoni i Disiplinës vendosi që të përjashtonte përjetësisht edhe 8 tifozë të Tiranës, mes tyre edhe Alban Rexhën.
Përmes një postimi në “Facebook”, Rexha i ka kushtuar një shkrim vajzës së tij, ku i kërkon falje që nuk gjendet pranë saj.
“Vajza ime të kërkoj falje që nuk jam pranë teje. Unë e di që të mungon qumshti, të mungon forca më e madhe, por ti mos u mërzit se Zoti do të ndihmojë. Gjithashtu edhe xhaxhi Goni nuk do t’iu lërë vetëm. Më fal, më fal, më fal Elif. Vetëm për ty mendoj. Mos e beso kurrë, ujku jot nuk është terrorist, por një njeri që beson shumë në Zot dhe nuk do ta bëja kurrë një gjë të tillë. Elif, mos u tremb nga babai jot, se unë e di se kush është e vërteta. Do dënohem si një ultras i Tiranës dhe jo si terrorist. Të do shumë babi”, shkruan Alban Rexha.
Në nisje të derbit mes Tiranës dhe Partizanit, tifozët u përleshën mes tyre, por ajo që ishte më e rëndë e që u zbulua nga policia ishte vendosja e disa bombave artizanale nga tifozët e Tiranës pranë tifozëve të Partizanit, por që fatmirësisht nuk shpërthyen.
Shtatë persona të tjerë të “Capital Crew”, të cilëve u është ndaluar hyrja për gjithë jetën në stadium janë: Enton Bande, Getard Çeliku, Mateos Majani, Aksel Manxhari, Thanas Bendo, Bledar Luga dhe Gentian Qosja.
