Zv.ministri i Brendshëm, Besfort Lamallari, i cili vizitoi të shtunën ambientet e Njësisë Speciale për Kapjen e Personave në Kërkim, theksoi se komponenti i Inteligjencës dhe Njësia Operative, janë shumë mirë të trajnuar.
Komponenti i Inteligjencës ka për detyrë të mbledhë informacionin, dhe Njësia Operative e cila funksionon në shërbim të Njësisë Inteligjente, bën të mundur ekzekutimin e urdhrave të arrestimit të personave më të rrezikshëm, qofshin këta në kërkim kombëtar ose ndërkombëtar. Njësia e Inteligjencës ka një pikë kontakti 24 orë në 7 ditë të javës dhe bashkëpunon intensivisht me agjencitë homologe në nivel evropian.
“Është njësia më e re speciale pranë Policisë së Shtetit, për identifikimin, gjurmimin e vendndodhjes dhe kapjen e personave më të rrezikshëm…Plotësojnë gjithë kushtet e parametrat e nevojshëm për të funksionuar si homologë të denjë të Njësive në vendet e Bashkimit Evropian”, tha zoti Lamallari.
Kjo njësi është prezantuar javën e kaluar në Poloni, me synim aderimin në Rrjetin ENFAST, që është rrjeti evropian për kapjen e personave në kërkim.
